أصوّت ازاي أنا دلوقتي ؟؟؟

ازيكم ؟؟

عاملين ايه ؟؟

يا رب تكونوا بخير

المهم بقى ...

من يومين كدا وبينما كنت أرتشف فنجان ال coffee mix المسائي

غرقت في بحر تفكيري طويلا

وقعدت أفكر في شئون مصر الداخلية والخارجية وما بينهما والمحلية

يمكن الاقي حل لمشاكل التعليم والاسعار والاسكان والعشوائيات ...الخ

تفتكري الحاجات دي ممكن تتصلح بسهوله

طيب هل تغيير القائد عامل مهم؟؟


معنى كدا لو اتغير القائد


حال مصر هيكون احسن

طيب مافيه احتماليه برده ان حال مصر يفضل زي ما هو

بس على الاقل هيكون فيه حاجه واحدة بس اتغيرت في بلدنا

وهنكون قاومنا فكرة الرئيس الأبدي

ويمكن تغيير القائد .. هو اول الخيوط لحل مشاكل البلد


بس القائد ممكن يكون مش هو المشكلة (دا ميمنعش انه جزء منها )


عشان كدا اللي حواليه كمان لازم يتغيروا


واهي الانتخابات جاية قريب ...


ياااااااااااه .. هيبقى فيه انتخابات ..

وهاشارك واروح اصوّت وهاقول رأيي حتى لو محدش هيسمعه

متشوقه اني اشوف برامج كل المرشحين ..برلمانيين او رئاسيين .. واختار واحد على حسب برنامجه


دي هتكون فترة حلوة جدا .. خصوصا الانتخابات الرئاسية


أخيرا هيكون عندنا ولو فرصة محدودة اننا نغير شئ روتيني


وحتى لو مفيش حاجة اتغيرت ..


دا أنا أول مرة هأشارك في انتخابات..(بحكم سني )


فكفاية احساس اني اشتركت و قولت رأيي ..........

- انتي يا بنتي .. انا بقالي ساعة بأنادي عليكي


(دا أخويا .. علطول بيقولي يا بنتي رغم ان فرق السن 3 سنين بس)

- أنا عايزة أطلع بطاقة انتخابية .. اقدم طلبي فين ؟؟


- بطاقة انتخابية ايه يا بنتي ؟؟ انتي نايمة ولا ايه؟؟ احنا في شهر 10 .. واستخراج البطاقة اخر معاد ليه 31 يناير ..خليها السنة الجاية ان شاء الله وعليكي خير


- لا مش معقول


بسرعة جريت على عمو جوجل عشان أتأكد من اللي قاله

وكانت الصدمة

فعلا كلامه صح


آخر معاد لإستخراج بطاقة انتخابية كان في 31 يناير


حد يقدر يقولي هاصوّت ازاي دلوقتي ؟؟

مش كانوا يخلوا استخراج البطاقة الانتخابية خلال العام كله


في الآخر مقدرش اقول غير :


يا رب انا واللي زيي نقدر نستخرج بطاقة انتخابيه عشان نقدر نعبر عن رأينا


حتى لو مش مسموع .. بس نكون ايجابيين ونعمل اللي علينا


ونحاول .. وربنا أكيد هيكون معانا .. لأنه قال في كتابه الكريم :


"إن الله لايغير ما بقوم حتى يغيروا ما بأنفسهم "


انتوا بقى ايه رأيكم ؟؟


هل عندكم بطاقات انتخابية ؟؟


ولو مش عندكم .. هل لو فيه فرصة تستخرجوا بطاقة .. هتستخرجوا ولا مش مهم اوي بالنسبة ليكم ؟؟

تقبلوا خالص تحياتي

أروى حبيبتي ....... بـــــقـــــيـــــت عــــــمــــة يـــا اولاد

تحياتي :


بقالي كتييييييييييير أوي مكتبتش

طبعا التيرم التاني عدا

والامتحانات كمان عدت غير مأسوفٍ عليها

والنتيجة زمانها جاية في السكة

ما تيجي ... احنا هنخاف ولا ايه ؟؟

طبعا دا كله مش مهم

عشان كدا مكتبتش عن الحاجات دي

وكمان لإني مش محتاجة أقولكم ادعولي قبل الامتحانات

لانكم اتعودتوا خلاص تدعولي

ولا محتاجة اقولكم أخبار الكلية لانها خلاص بقت كلية عالمية

بعد الأحداث اللي حصلت مؤخرا وشفناها في برنامج 48 ساعة

بس في حاجة أهم حصلت :

أنــــــــا

بــــقــــيــــت عـــمــة

هاهاي

"دي ضحكة تدل على الفرحة .. لو تعرفوا نمنم بتاع عالم سمسم"

ومن هنا أبعث بأرق التهاني إلى أخويا العزيز : أحمد رجائي محروس " القعقاع "

وزوجته العزيزة : خديجة

بوصول :

أروى أحمد رجائي محروس

وبأقولهم البنت لعمتها "الوسطانية "

يعني أروى هي مرمر

يعني هي أمورة عشان طالعالي طبعا

وطبعا هتكون ذكية زيي بالظبط

ومتفوقة في دراستها زيي " بس مش بالظبط ...يعني أكتر شوية "

وان شاء الله تكون قرة عين لوالديها " زيي كدا برده "

هههههههههههههههههه


وكفاية كدا عشان مش بأحب أتكلم عن نفسي كتير

تواضع بقى .. هأقول ايه ؟؟

وكمان هتكون متواضعة زيي

وطالما هتكون زيي يبقى أكيد هتسمع كلامي أنا وبس .. صح يا أروى ؟؟

سامعاها بتقول : أيوة طبعا يا عمتو

طيب يلا يا حبيبتي قومي اغسلي المواعين اللي جوا دي

ههههههههههههههه

طبعا هي هتقولي حاضر .. بس أنا عشان طيبة وعارفه انها لسه صغيرة

هاستنى لغاية ما تبقى بتمشي

يعني سنة بالكتير .. بعد كدا مش هيبقى ليها حجة

هههههههههههههههه

يلا تتربى في عزكم ان شاء الله .. وتشوفوها أجمل عروسة

اجــــــــــازة ســـــعــــــــــيــــــــــدة :)

ازيكم

عاملين ايه؟؟

يااااااااااااه احساس الاجازة حلو أوي

( قال يعني كنت باذاكر )

ههههههههه

بس برده فترة الدراسة كانت رزلة الترم دا

دا كفاية الامتحانات اللي مش ناوية أنجح فيها

لا إلا الخيم بقى اللي امتحنا فيها

أنا عايزاكم انتوا تشوفوا وتحكموا

يا سلام على قلبهم .. كتر خيرهم يعني حاطين لمبات

دي صور من خيم متفرقة مش من خيمة واحدة

ايه رأيكم بقى ؟؟؟

بس برده الصور مش كفاية كان نفسي أجيبلكم شوية من التراب اللي على الديسكات

والأيام اللي كان فيها مطر بقى

أي نعم هي مكنتش بتمطر واحنا بنمتحن بس مطرت في اليوم اللي قبل الامتحان

ولانهم حاطين مشمع فوق الخيمة

فالمشمع جمع الميه من يوم المطر

ونزلها فوقنا يوم الامتحان

بجد

بقت مية المطر تنزل علينا فجأة كدا

وحصلي للاسف الموقف دا

انا قاعدة في أمان الله واذا بالماء بينزل من فوقي انا بالذات وكأنها اختارتني

والتراب اللي على الديسك + ماء المطر = طينة

: )

ولو بصينا في نص الخيمة هتلافيها بتنقط

ما علينا .. اهي عدت

ويارب أنجح

وبمناسبة الامتحانات بقى .. الصورة دي اهداء لطلبة تجارة انجلش :

يلا أشوفكم في تدوينة تانية

واجازة سعيدة ان شاء الله

خالة كلاكيت لتاني مرة

تحياتي :

أول ما شرفت كل واحد في بيتنا قال انه هيكتب عنها تدوينة

واستنيت حد يكتب ..... محدش كتب

ان حد يكتب .... محدش كتب

فقولت استغل انشغالهم بيها وأكتب أنا من وراهم

هههههههههههههههه

(حلوة دي صح)

اوعوا تكونوا دا كله معرفتوش باتكلم عن مين ؟؟

كدا تبقوا غلطانين بقى

طبعا باتكلم عن رورو او ريري كما يسميها البعض

اللي هيا رفيده حبيبة الملايين

بنت أختي المولودة الجديدة في يوم 6/1/2010

بس للاسف زوروا شهادة ميلادها وكتبوها

10/1/2010

شوفتوا التزوير !!!!!!!!

ما علينا

المهم بقى انا كدا ابقى خالة كلاكيت لتاني مرة

ايوة انتوا نسيتوا يوسف أول مرة

بقى عندنا يوسف ورفيدة

طبعا البنت زي القمر طالعة لخالتها طبعا

حد يقدر يقول غير كدا ولا ايه ؟؟؟

مامتها كانت من زمان نفسها تسمي رفيده

دا غير ان رفيدة هي اول طبيبة في الاسلام

أما عن صورها فانسوا

عشان البنت لسه صغيورة

ومينفعش يعني احط صورتها دلوقتي لاحسن يجرالها حاجة ولا حاجة وانا اكون السبب

او يجيلها عريس ولا حاجة وهي مش ناوية تتجوز دلوقتي

اقولكوا اللي عايز يشوفها يتفضل عندنا هنا .. بس متنسوش النقطه بقى

باهزر اكيد .. تشرفوا .. طبعا

وعقبال يا رب ما اكون عمة

ان شاء الله عمر (ابن أخويا القادم ) يخرج بالسلامة وأكون عمة

ههههههههههههه

وأخيرا انا هأبدأ امتحاناتي يوم الأحد الجاي

يعني أنا مكنتش باذاكر المفروض بقى ........

ما اذاكرش برده يعني هم اللي ذاكروا عملوا ايه؟؟

هابقى انزل الجدول في تدوينة لوحده

عشان تدعولي كويس

وبالتوفيق لكل الطلبة عامة وطلبة تجارة انجلش خاصة

يلا سلام

جدول امتحاناتي

17 /1 market

20 /1 money and banking

23 /1 small business

26 /1 entermideate account

28 /1 macro

31 /1 electronic commerce

ومتنسوش اني شايلة مادة وهامتحنها

1/21 economy

وربنا معايا و مع كل الطلبه

مصر حبيبتي في كفه.. وكل الدنيا في كفه

بصراحة حماقي يستحق التحية على أروع أغانيه

وفعلا مصر في كفه وكل الدنيا في كفه

وحتى لو خسرنا دي مجرد لعبة

مش هتقلل من مصر ولا الجزائر ولا هتزيدهم

لان مصر هي مصر في كل الأحوال

وألف مبرووووووووووووك للجزائريين ولينا كمان

علشان في الآخر كلنا اخوات

ولو فكرنا شوية هنلاقي ان احنا فرحانين ان في منتخب عربي افريقي اتصعد لكأس العالم

مش هتفرق بقى مصر ولا الجزائر

ومن دلوقتي أكيد كلنا بنشجع المنتخب الجزائري

وبنقولهم ربنا معاكم وكلنا وراكم .. بنشجعكم

أما المنتخب المصري فشكرا لمجهودكم بس لازم تتعلموا من أخطائكم

و ان شاء الله تتعوض في 2014

وألف مبروووووووووك تاني للمنتخب الجزائري والجزائريين

وتحياتي لهم

وتمنياتي لهم بالتوفيق


إمضاء :

مواطنة مصرية

فترة امتحانات ميد تيرم

السلام عليكم ورحمة الله وبركاته

عايزة احط جدول الميد تيرم للذكرى الــــــــهــ......

السبت 14\11 : محاسبة متوسطة

الاحد 15\11 : ادارة مشروعات صغيرة

الاثنين 16\11 :ادارة تسويق

الثلاثاء 17 \11 :التحليل الاقتصادي الكلي

الاربعاء 18\11 :اقتصاديات النقود والبنوك

الخميس 19\11 :تطبيقات المحاسبة الالكترونيه

مواعيد الامتحانات من الساعة الحادية عشرة والنصف ظهرا الي الثانيه عشر والنصف ظهرا

طبعا لازم تدعولي

دا شئ مفروغ منه

عشان كدا لغيت التعليقات

تحياتي لكم

كل عام وأنتم بخير

نهنئكم بعيد الأضحى

مع تحيات : جمعية مرضى الزهايمر

ههههههههههههههههههههههه

تقبل الله منا ومنكم صالح الأعمال

كل عام وأنتم بخير

وعيد فطر مبارك

صلاة العيد الساعة :

6:07

متنسوش تصلوا العيد

صحيح قبل ما انسى

كل واحد وواحدة يبعتلي رسالة تهنئة بالعيد (رسالة على الموبايل طبعا )

أما بالنسبه لرسايلي

لما أشحن بقى هأبعت

وياريت لو حد عاوز يبعتلي رصيد أكون شاكرة

هههههههههههههههههههه

خبر أخير كدا :

مش أنا حصلت على المركز التاني في المسابقة الرمضانية في منتدى اسطنها

والجوايز مادية ومعنوية

ومحدش يقولي بالنص

هههههههههههههههه

ودا الوسام بتاعي

حصلت المعجزة الالاهية و نـــــــــجـــــــــحــــــــــت

بعد انتظار طويـــــــــــــــــــــــــــــــــــــــــــــــل


أخيرا كليتنا المبجلة حنت علينا وطلعت النتيجة ( من قواعد الكلية اننا نزهق من انتظار نتيجتنا لدرجة اننا بننساها )

وللأسف ان من قواعد كليتنا المبجلة كمان ان النتيجة اول ماتتحط تتقطع

( دي قاعدة عريقة في كليتنا )

بس هو السؤال :

اذا كانت النتيجة لسه محطوطة بليل واحنا روحنا الكلية الصبح ( اللي بعد الليل دا علطول )

ازاي حد يلحق يقطعها بالسرعة دي ؟؟

بس اللي عرفته اننا دلوقتي في زمن السرعة ..

فدا الطبيعي

والطبيعي كمان اننا نروح نلاقيها متقطعة

وكالعادة شئون الطلبة بتعلق النتيجة تاني

بس اللي مش طبيعي بقى

ان احنا الفرقة الوحيدة ( أولى انجلش ) اللي نتيجتها متعلقتش تاني

واللي لسه ما شفش نتيجته ( غالبا كل الطلبة ) يروح لشئون الطلبة هي عندها نسخة هناك

ويا سلام بقى لو الموظفين هناك مزاجهم مش رايق ( ودا بيكون الغالب )

قبل ما تتكلم تلاقي حد بيزعقلك

تحس زي ما تكون قولتلهم حاجة غلط

( يمكن السؤال عن النتيجة بقى غلط اليومين دول )

ما علينا

المهم يعني

اني نـــــــــــجـــــــــــــــــــــحــــــــــت

ودي فعلا معجزة الاهية

وطبعا متسألوش عن التقدير

لاني شايلة مادة .. ( اقتصاد )

الحمد لله هو أنا كنت طايلة ؟؟


بإسمي وإسمكم أقدم أجمل التهاني

إلى أجمل مرموووووووووووووووووووووورة واقولها

الف مبروووووووووووووووووووك على النجاح ومن تقدم الى تقدم اكبر ان شاء الله

..........................

ايه مش عاجبكم بأهني نفسي

حد عنده اعتراض ولا حاجة

!!!!!!!!!!!!!!!

يلا كله يقولي مبرووووووووووووك

علشان انا نجحت في اولى كلية

وبقيت في الفرقة التانية


وفي الاخر بأحب أشكر كل صديقاتي الجميلات


اللي دعموني بدعائهم ليا وقلقهم على نتيجتي


هم ناس كتير ...لذلك مش هأقدر أكتبهم كلهم


بس أخص بالشكر : إيمان


لان وشها كان حلو عليا


ربنا يخليهم ليا كلهم وميحرمنيش منهم أبدا

رحلة صيد ... من مغامراتي

هي مش رحلة بالظبط يعني

لان هي مكنتش محتاجة سفر يعني

بس كفاية اننا نزلنا من بيتنا

ومشينا خطوتين بالظبط وبقينا كدا جاهزين للصيد

محدش يسألني فين المكان دا... لانها معروفة ان اللي بيصطاد بيصطاد من ايه؟؟

من البحر أكيد ... بس هو مش بحر يعني ...

المهم يعني انها حتة فيها سمك وخلاص

هي ...

ترعتنا الخضراوية


ايه دا .. انتوا لازم تسألوا يعني!!!


في يوم كدا................. كان عبدالرحمن (أخويا الصغير )

ومحمد ( أخويا الكبير ) نزلوا يصطادوا


اه ..... سمك اكيد يعني مش حيتان !!!!!!!!!!!!!!!!!!!!



فقلت لازم انزل اشرف عليهم طبعا

فعملنا رحلة صيد

ونزلت انا ومريم ( أختي الصغيرة )



وطبعا انا اصطدت سمكتين بحالهم



وفي صور اكتر ممكن تنزلها مريم على مدونتها .. ترقبوها

( أي خدمة باعملها دعاية اهه )

.........................

ودي صور السمك بعد ما قليته

وبالهنا والشفا

ايه دا انتوا هتبصولنا في السمكتين اللي هناكلهم

يلا مش مشكلة .. احنا اصلا كلناهم خلاص

اشوفكم في بوست تاني

سلام

أنا جيت .... نورت البيت

وعدت أخيرا


ازيكم .. عاملين ايه


لحظة العودة دي بتفكرني بـــــــــــ



ههههههههههههههههههههههههههههههههه


سيبكم من سنبل دلوقتي .. وخليكوا معايا

أخباركم ايه .... بجد وحشتوني

طبعا بتسألوا عني دايما وعن أخباري

عارفة

عارفة

حب الجماهير دا عارفاه

ههههههههههههههههههههههه

أنا هأقولكم على اخباري ... وسيبوكم من القنوات اللي دايما بتطلع اشاعات دي

ههههههههه

الأول كدا أنا الحمد لله أخدت الاجازة ..( دا انا خلاص هابدأ الدراسة تاني اهه)

بس دا من يوم 15/6

يعني من كتييييييييييييير

معلش بقى اتاخرت في التدوينة دي علشان كنت مقضياها نوم وكدا يعني

بس كدا ..

دي أخباري الحديثة

أما بقى عن أخباري القديمة

!!!!!!!!!!!!!!!!!!!!!!!!!!!!!!!!!

ما بلاش اخباري القديمة دي

اه بلاش احسن

يعني

بلاش نتكلم في نتيجة الترم الاول

علشان كدا كدا نتيجة الترم التاني على وشك الظهور اهي وهنتكلم فيها للصبح بس دا لو كانت حلوة طبعا

اما لو كانت وحشة فمش هاتكلم فيها

..................

المهم بقى انا عاملة التدوينة دي مخصوص علشان اقولكم انا قضيت الصيف ازاي

هو في الاول طبعا قضيته نوم زي ما قلتلكم قبل كدا

وبعدين قررنا نقعد اسبوعين كدا في بلدنا الحبيبة

طبعا هي مفيهاش مصيف بس هي بالنسبالي احسن من كل المصايف

طبعا ..... لاني بأشوف أعز أصحابي

أنا طبعا لازم أحكيلكم عن مغامراتي ( هي مش مغامرات اوي يعني ) في بلدي الحبيبة


تابعونا ................... لتعرفوا

رحل ولم يكن يوما " في الممنوع "

عام على رحيله ........

بعد أن كان في الحاضر أصبح في الماضي .....

وبعد أن كنا ننتظر إطلالته في برنامجه الإسبوعي أصبحنا نترحم عليه وندعو له.....

وبعد أن كتب لمستقبل مصر القادم أصبح ينعت بالراحل .....

وبعد أن كنا نقرأ عموده الصحفي ونستفيد بشيئ جديد كل مرة أصبحنا نقرأ مقالات من الأرشيف ولكن مازلنا نستفيد.....

بعد كل ذلك ... وبعد معاناة دامت أكثر من سنة ...... جف قلم مجدي مهنا برحيله عنا ....

جف القلم الذي ظل يكتب إلى أن توقف القلب عن النبض وصعدت الروح إلى بارئها قلمه الذي لم يتردد أن

يكتب الصدق .

قلمه الذي لم يعرف غير الصفاء والنقاء................. وكيف لا ؟؟؟؟

وقد كان يملأ قلمه حبرا من شريان دمه النقي وقلبه الصادق وضميره اليقظ .

رحل ذو القلم الحي ... وحتى يوم رحيله كان يوم عظيم ..حيث اتحدت فيه كل فئات الشعب .. فلقد ضمت

جنازته كثيرا من المفكرين والسياسين من جهات معارضة ومؤيدة من إخوان وشيوعيين وحزب وطني

والوفد ومن كل الاتجاهات .

رحيله هو الشيئ الوحيد الذي جعلهم يتفقوا ... اتفقوا على نقاءه وصفاءه واجمعوا على جمال شخصيته.

حقا ... الأشخاص الصادقين لن تجد من يختلف عليهم ...

وأخيرا بالرغم من أن روحه فارقت جسده الذي وارى التراب إلا أن روحه مازالت تحيا متجسدة في كلمات

مقالاته وفي موضوعات حلقاته المسجلة في برنامج ( في الممنوع ) .

رحمه الله رحمة واسعة وغفر له وأسكنه فسيح جناته وألهم أهله الصبر والسلوان .

خبر لم تذعه النشرات الاخبارية .. ولا الصحف بكل انواعها

عندي ليكم النهاردة خبر فعلا يستحق اني أقول عليه حصريا على مدونتي

هو الخبر دا يخص النهاردة بالتحديد .. يعني الخبر لسه طازج .. وجاي من الفرن

وبالرغم من ذلك ..........بصراحة الخبر دا ملقتهوش في أي جريدة لا قومية ولا حتى معارضة .. وسمعت نشرات الاخبار

كلها.........وبرده ملقتهوش .. الظاهر ان الكل كان متفق انه يخبي الخبر عنكم .. بس انا بصراحة معجبنيش الوضع وقلت انا لازم اقولكم

..علشان انتم ناس مثقفين ... وايا كانت اتجاهاتكم .. اكيد مش هتوافقوا على استمرار اخفاؤهم للخبر

وبصراحة كمان عدم نشر الخبر يدل على انهم متخيلين انكم مش هتعرفوا حاجة عن الموضوع .. يعني هم قالوا :

مش لازم ننشره وهم كدا كدا مش هيعرفوا

بس بصراحة انتوا لو سكتوا انا باقولها باعلى صوتي .. لا ... انا مش هاسكت... مش هاوافق ابدا اني اكون

سلبية ..ولازم طالما عرفت الخبر انشره .. علشان يكون الناس كلها على علم بيه

بصراحة كدا ..

مش عارفة اقولكم ازاي ............

تم تنصيب اوباما رئيسا للولايات المتحدة ... ورحل بوش غير مأسوف عليه

عارفه ان الخبر دا قديم ..وكل الناس اتكلمت عنه ومحدش اخفاه ....

بس مش هو دا الخبر اللي عايزة اقولكم عليه

بصراحة كدا مش قادرة اقولكم ....

باحاول اتكلم اهه ...

..............

....................

...........................

.....................................

الخبر الذي لم يتم نشره في النشرات ولا في الصحف بكل انواعها هو :

ركزوا كويس ....

اوعوا حد يتخض ...

احنا عايزين نتحكم في اعصابنا ..

هو :

ان اليوم كان ........

كان

........

كان اخر يوم في امتحاناتي

هههههههههههههههههه

مش فعلا هو حصريا على مدونتي ... ولا ايه رايكم ؟؟

هاتوا لي أي نشره او جريدة او حتى موقع قال ان مرمورة خلصت امتحاناتها النهاردة

طبعا مش هتلاقوا .....

ههههههههه

بس قولولي انتوا توقعتوا يكون الخبر ايه ؟؟؟