غزة تحت النار

اللهم ارحم اهلنا في غزة واجعل صواريخ الصهاينة بردا وسلاما

اللهم ارحم المسلمين من المستضعفين .. اللهم آمن روعاتهم واستر عوراتهم واحفظ ذرياتهم وارحم ثكالاهم واحفظ أياماهم واجعل أطفالهم شفعاء وقتلاهم شهداء ..

و حسبنا الله ونعم الوكيل

عيد ميلاد الفيل الصغير ... هو مش فيل اوي يعني

منذ عامين ....

و في نفس الشهر .....

و بالتحديد يوم

11/12

ولد سوفه ) ابن أختي )

يوسف أحمد عبد الستار

ودي صورة ليه وهو صغير

بس امبارح بقى عملنا حفلة على الضيق كدا ..احتفالا بانه كمل سنتين بالتمام والكمال

كل سنة وانت طيب يا سوفة

وعقبال 1000000000000000000000000 سنة

يلا حالا بالا بالا حيو ابو الفصاد ...هيكون عيد ميلاده الليله اجمل الاعياد

فليحيا ابو الفصاد

وأسيبكم مع بعض الصور ... اللي استطعنا التقاطها من قلب الحدث

ملحوظة : بس قولوا بسم الله ما شاء الله عليه ...لأحسن الواد يحصله حاجة وهأكون أنا السبب

المــــــــــكــــــــــتــــــــــــبـــــــــــــة ولـــــــــــــــعـــــــــــــــــــت

تحياتي :

اقرا الحادثة .............اقرا الحادثة

علشان لما اقولكم متفكروش في دخول كلية التجارة تبقوا تصدقوني

اهي ولعت .. مبسوطين كدا

هو بصراحة انا مكنتش هناك ساعتها بس آثار الحريق باينة اوي

واللي حصل ان يوم السبت الموافق 29/11 حدث حريق بمكتبة كلية التجارة شعبة عربي

وبيقولوا بقى ان كان في مطافي وحاجات كدا

وطبعا سبب الحريق هو ماس كهربائي ....

معلش الخبر مش كامل اصلي محضرتش الحريق

وهي صورة واحدة بس اللي اخدتها ....و بصعوبة كمان ..علشان اللي كانوا قاعدين اصلا كانوا بيضحكوا عليا

وكأنهم عايزين يقولوا مين المجنونة اللي بتصور دي

ولما طلعت فوق علشان آخد صورة واضحة ..لقيت الأمن ..وطبعا مقدرتش اعمل حاجة

المهم بقى عايزة اقولكم عن نتيجة نتجت عن هذا الحادث الاليم

طبعا غير ان المكتبة العظيمة اللي عمري ما طلعتها ولعت

لا في نتيجة تانية ....وهي اغلاق باب مبنى محاضرات تجارة عربي

بعد دخول الطلاب لمحاضراتهم في المدرجات .... (يعني اللي جم متأخرين معرفوش يدخلوا حتى المبنى نفسه )

وللأسف لما المحاضرة خلصت ..قاموا بفتح الباب الخلفي للمدرج ..واللي هو تقريبا ميجيش متر في متر

وطبعا تزاحم الطلاب بشكل بصراحة وحش اوي وغير حضاري

يلا ..حصل خير ..والحمد لله الباب اتفتح ..وكله تمام

بس المبنى خد ديكور حلو اوي بصوا ..

طبعا في ناس .... هتقولي ..وانتي مالك بمبنى عربي ..مش انتي انجلش..خليكي في حالك

بأقولهم ..وايه الفرق بينهم ..مش اللي حصل ممكن يحصل عندنا برده ..وبعدين أنا ليا أصحاب كتير في عربي

ملحوظة : لوعرفت آخد صور تانية هيتم إضافتها للتدوينة

الف مبروووووووووووووووك ....جت متأخرة

الف مبرووووووووك لمين ؟؟؟؟؟؟

مش عارفين ....







للقرصان الشديد ..او القعقاع ..رجل بألف رجل


بمناسبة انه خطب خديجة ...(يعني هو لو خطب اي حد تاني مكنتش هأقوله مبروك ..لكن علشان خطب القمر بس )

أحب اقولهم الف مبروووووووووك ..

وعقبال الفرحة التامة

ومعلش جت متأخرة ..انتوا عارفين بقى كنت منقطعة عن النت وكدا

المهم انها جت وخلاص ..علشان محدش يزعل

وكفاية كدا عليهم

بيان

تحياتي :

كنت عايزة ابلغكم اني ناوية اتواضع واحضر امتحان الميد تيرم بتاعنا ...............وعلى الحاضر ان يعلم الغائب

هو انا بصراحة مكنتش ناوية اعمل كدا خصوصا انكم عارفين دوشة الجماهير دي .....وبقى كمية الاعلاميين

والصحفيين اللي اول ما يعرفوا الخبر هيجوا يصوروا علطول ..وطبعا لاني متواضعة زيادة عن اللازم فانا مش

باحب اظهر اكتر من مرة في القنوات يعني كفاية 20 قناة بس ..في اكتر من كدا تواضع ؟؟؟؟

بس في سبب كمان لعدم حضوري ....وهو اني اصلا لغاية دلوقتي مفتحتش ولا كتاب ..عادي يعني ...دا الطبيعي

بس بصراحة لما فكرت مع نفسي ...قالتلي (نفسي ) يا بنتي فضي من وقتك شوية واشفقي عليهم و روحي ..يمكن

يكون في مصلحتك وتعرفي تحلي وكده ....واهو ذكي عن صحتك

كل اللي عايزاه منكم بقى يا شطار انكم تدعولي ....علشان عارفين انا لو محلتش كويس ..دا معناه انكوا

مادعيتوليش ...وكمان معناه اني هأضطر اني اعاقبكم بطريقتي .. اقولكم هاعمل ايه ....ولا اخليها سر

أحسن...عارفه انكم فضولين علشان كدا هأقولكم ...

عقابكم هيكون هيكون ......

اني اقفل المدونة ....ايوة سامعة واحدة هناك اهه بتقول يا ريتها تعاقبنا كل يوم ....بقى كدا طيب يلا بره يا شاطرة

وما شوفش وشك في محاضرتي تاني ....اقصد في مدونتي ...

شفتوا بقى نسيتوني اقولكم ...ان امتحانات الميد تيرم هتبدأ يوم السبت الجاي الموافق 22/11

يعني من الآخر ما تحلموش انكم اليومين الجايين دول والاسبوع الجاي كمان ...تلاقوني اونلاين

( دا كلام بس ماتاخدوش في بالكم )

المهم انكم ماتنسوش تدعولي

اختراق

رسالة تهديد الأولى بعد الألف
بسم الله

نقر نحن القرصان الشديد قوى على أننا قمنا باحتلال هذة المدونة وضممناها إلى أملاكنا - تماما كما قام أصدقائنا من القراصنة باحتلال منتدى اسطنها البارحة - وعلى المتضرر اللجوء للقضاء .. حتى يبقى الوضع كما هو عليه .
وتقبلوا تحياتى وفريق الإعداد أقصد " فرقة القراصنة ", وأنتظروا مشاركاتى الجامده جدا

ولكم جزيل الشكر

-- -- -- -- -- -- --
القرصان الشديد قوى

__________________

marmarmarmora تقول :

اللي مكتوب فوق دا ..اختراق بس مش اختراق اوي يعني ...اصله تم عن طريق القرصان الشديد اللي هو واحد انا

عارفاه وبلاش اقولكم عليه علشان انتوا كمان عارفينه ...

مش عارفه هو عمل كده ليه ...يمكن علشان قلتله ان في منتدى عزيز عليا تم اختراقه

فهو افتكر ورجع تاني يشوف نفسه القرصان الشديد قوي

هو قبل كده دخل وكتب نفس الكلام دا ..وبعدين انا مسحته ....

هو صحيح انا معرفش هو بيدخل باسمي ازاي .....بس اكيد هاعرف

وياريت اللي عنده معلومات يقولي (علما بانه مش عارف الباسورد بتاعتي )

المهم بقى اني المرة دي قلت مش هامسح التدوينه دي واسيبها ووريكوا اللي بيحصلي على المدونة من الناس اللي

عايزة تضايقني ...بس اكيد بقصد الهزار وبس

وكمان كنت هأرد في التعليقات ....بس قولت لأ ...اكمل على التدوينة

بس تعرفوا كويس انه عمل كده ...انا بقالي فترة أقول هاكتب ايه في المدونة ..هاكتب ايه

وفجأة لما فتحتها لقيته حاططلي تدوينه

طيب كويس ....بس ياريت متحطش اكتر من تدوينه في اليوم

لاحسن قراء مدونتي يزهقوا كده

ههههههههههههههههههههههه

وبقولكم تاني اللي يعرف طريقة هو يقدر يدخل بيها يقولي

لاني مهما غيرت الباسورد بيدخل برده عادي

والحمد لله جت سليمة

وسلامي لكم وللقرصان الشديد

ههههههههههههههههه

معاناتي في الكلية

تحياتي :
شيئ سيئ ان الواحد يرجع تاني للدراسة ...خصوصا لما يكون لسه طالع من ثانوية عامية

كنا دايما لما نسمع حد بيتكلم عن نظام أي كلية ...كنا بنتمنى ندخلها

بس انا دلوقتي بقول لكل اللي لسه مخدوعين ....الكلية مش حلوة زي ما انتوا شايفنها كده

اه صحيح ....

ايه دا هو انا مقولتلكوش انا دخلت كلية ايه ؟؟؟؟؟؟؟؟؟؟لالالالالالالا

مش كنتوا تسألوا ولا تطمنوا حتى ......ماشي ..عموما

أنا- وأعوذ بالله من كلمة أنا- دخلت كلية تجارة.. الشعبة الانجليزية ..بيسموها تجارة انجلش

مع اني معرفش ايه اللي بيدرسوه في معهد دولسي قسم لحسة ..بس انا متاكده انه هيكون احسن بكتير من تجارة انجلش

...خلوني احكيلكم شوية عنها (يمكن حد عاقل ياخد بنصيحتي وميدخلهاش )

في الأول بنات كتير ( محدش يسألني هم مين علشان هم عارفين نفسهم ) قالولي متروحيش الكلية غير بعد العيد ..وانا

عملت حسابي على كده ..وكل الللي يسألني هتروحي الكلية امتى ..اقوله بعد العيد وعليك خير (صحيح نسيت أقولكم كل سنه وانتم طيبين )....

لغاية ما جه يوم 21/9 وهويوم الاحد (اول يوم في الدراسة في بنها ) وانا بقى فرحانة في مريم وعبد الرحمن انهم

رايحين المدرسه وانا هاقعد في البيت وهم هيصحوا كل يوم بدري وكده

ههههههههههههههههههههههههه

وبعد ما مشيوا ...وانا قاعدة في أمان الله ...باتفرج على التليفزيون (بصراحة مش عارفة التليفزيون بينتهز الفرصة

ان الاطفال في المدارس وبيعرض الكارتون الصبح ..يمكن مش عايزنهم يتفرجوا )...ما علينا ...المهم ..لقيت ماما(

كانت راحة تدفع المصاريف ) بتتصل بيا وبتقولي : انزلي محاضراتكم شغالة

اهئ اهئ اهئ اهئ اهئ......

على مانزلت كانت الساعة تقريبا 11 وحسب الجدول (اللي نزل من اول يوم ..مش عارفه ايه ده ) ان المحاضرة الاولى من 8الى 11( اللي هي محاضرة محاسبة )..يعني المحاضرة خلصت ...قلت مافيش مشاكل الحق التانية اللي بعدها ...رحت بقولهم في ايه انتوا ماشيين ليه ...قالولي مفيش محاضرات تاني خلاص قاعات المحاضرات اغلقت ...رجعت للبيت بدون خفي حنين حتى

أوك ....دا كان أول يوم .....تاني يوم بقى رحت الساعة 8 ( عمركم سمعتوا عن محاضرة بتبدأ الساعة 8 )

....يعني رحت في الميعاد وكله تمام

(دي صورة لمدرجنا في الكلية أخدتها بعد

ما المدرج بقى فاضي)

وقعدنا وكلنا مستنيين الدكتور

المنتظر (دا زي المهدي

المنتظر كده ) ...... الساعة 8,5 والدكتور لسه مجاش ...9 ولسه مجاش ...9,5 وخلاص هأطق ولسه مجاش ...10 انتوا لسه مستنين معايا ..قلبكم أبيض اوي ...الدكتور مجاش غير الساعة 11 ...والحمد لله اخيرا حضرت محاضرة ...دي

كانت رياضة باحتة انما ايه عسل ....بس الربع الاول من المحاضرة كانت تعريف بشخص الدكتور *..والتحدث عن انجازاته العظيمة ...ودراسته في

انجلترا ...بس بصراحة دكتور محترم يعني مأخدش كتير في التحدث عن نفسه وبعدين شرح شوية مسائل خفيفة كده

....وسألنا في الاخر لو في اي مشكله او كده ...قلناله على الانتظام في المواعيد طنشنا كده ..وقلناله على التكييف اللي

مش شغال واحنا قاعدين مخنوقين

..قالنا انه اول يوم كان شغال وانتوا بوظتوه قلناله كتر خيرك...وخلصت المحاضرة...المفروض بقى في واحدة بعدها

...بس الظاهر انها اتلغت ..او مش عارفه بقى ..المهم روحت البيت اتخمدت ..واليوم عدى

وكل يوم خلال الايام اللي قبل العيد كانوا بنفس النظام دا تقريبا ...

بس المحاضرات متعديش كدا من غير ما احكيلكم عليها ....او على اهمها

كان عندنا محاضرة مبادئ الاقتصاد ....ومش محتاجة اقولكم المحاضرة بدات الساعة كام ..انتوا عارفين ...وبدأ دكتور*....يعرفنا بحضرته ..وبالانجازات اللي هو عملها خلال حياته ..واخد اغلب الوقت في كده ..دا غير انه كل

ما يتكلم داخل المحاضرة يقولنا انا الانجليزي عندي زي العربي ....ببساطة انا عشت 8 سنين في انجلترا واشتغلت 7

سنين في السفارة الامريكية ومش عارفه قضى 12 سنة تانيين فين كده .... متقلقوش اصل السيرة الذاتية دي دايما

بيكررها يعني مفيش حاجة هتضيع منها وانا هابقى اعمله كتاب عن قصه حياته علشان ميتعبش نفسه ويتكلم كتير و

يبقى يوزعه على الطلبة ..ويوزعه ليه يحطه في مكتبه وينزل في اخره شيتات(معرفش أصلا اذا كانت المادة دي فيها

شيتات ولا لأ) ....والطلبه كلها هتشتريه ..وهو هيكسب وطبعا النص بالنص (مش انا اللي عاملاه )

المهم ..نيجي بقى للمحاسبة .....والدكتور * ..دا بقى دكتور محترم برده بس من النوع اللي هو واخد الحكاية

جد اوي ...لدرجة ان هو قال اللي هتختلف اجابته عن اللي بقوله هيكون بياخد درس ....واللي بياخد درس دا بقى

ياويلة يا سواد ليله ..هيسقط هيسقط ....

دا غير الغياب اللي هو مصر ياخده كل ما يدخل ....واقفلوا الموبايلات وكده .. وبيمسك ورقة الاسماء وينده على بعضها

ويسألهم عن اللي قاله في المحاضرة وفي المحاضرات السابقة ...

مش هاقولكم بقى عن دكتور مادة السلوك الاداري ....دكتور* ..دا بقى محترم كدا وكله ذوق ....وتحس كدا انه

بيشرح اتيكيت ....ولما كانت محاضرته هتستمر لمدة 3 ساعات سمحلنا ببيريك في النص كدا ...مش بقولكم محترم

...مش الدكاترة التانيين يقعدوا يدشوا يدشوا لغاية ما نفقد تركيزنا ...هو صحيح ما جاش غير الساعة 9 ..بس لما

اتاح لنا الفرصة اننا نعترض اعترضنا وقال لنا معلش والله على ما جيت ..وانا اكيد مش هاجي قبل 9 ..يعني المحاضرة

هتبدأ 9....وقالنا ايه رايكم في اليوم بتاع المحاضرة مناسب ولا نغيره ( محترم بقى )

المهم ان الحمد لله المحاضرات دلوقتي بتبدأ في ميعادها ...وبأروح كل يوم الساعة 8 ومش بارجع غير الساعة 1او2

..وطبعا السكاشن لسه مانزلتش

كفاية كدا صدعتكم بالكلية بتاعتي وانتوا مش ناقصين ....انتظروا صداع آخر في البوست القادم

* حذفت أسماء الدكاترة لعدم احراجهم

أهه جه يا ولاد

السلام عليكم ورحمة الله وبركاته

خلاص شهر رمضان الكريم بقى قريب جدا وخلاص كلها 7

ايام تقريبا

ويهل علينا رمضان ....

وايام رمضان الجميلة

اصل رمضان كله من اوله لآخره ....دايما ليه ذكريات جميلة

اوي

الفوانيس ...بقى والزينة اللي بتتعلق

الصحيان للسحور والطرق المتعددة المتبعة علشان نصحا....

اللي بنتحايل عليه يصحى ...واللي يدلق جردل ميه علينا

علشان نقوم ...عادي بقى

وتجهيز السحور ..اللي مش دايما باشارك فيه....

تقضية بقيت اليوم ....ما بين المسلسلات وبين البرامج ...واكيد لازم لو في برنامج للاستاذ عمرو خالد وبرامج دينية أخرى .....

وطبعا تجهيز الفطار ....ومش وقت الكلام عن الاكلات لحسن ممكن نخلص البوست عليها ...

وانتظار المغرب.....ومريم وعبدالرحمن وهما بيعيطوا ويقولوا جعانييييييييييييييين

ههههههههههههههههههههههه

وبكار طبعا ...

وصلاة التراويح ...اللي حتى لو ماروحتش اصليها ...بيبقى صوت المسجد قريب جدا وباسمعها....

ومحاولة ختم القرآن ...

وطبعا دا غير كم (كمية ) الراحة النفسية اللي الواحد بيحس بيها نتيجة انه حاسس ان ربنا هيغفر له الذنوب مهما كبرت ....

مع ان دا كمان بيبقى في غير رمضان ....بس دا دايما احساس خاص برمضان

والاعتكاف في العشرة الاواخر ...

دا كله بيكون في رمضان ..... ويخلص رمضان ... واحنا بنتمنى نكون اخدنا المغفرة والرحمة والعتق من النار

وكل عام وانتم بخير

أسوء أيام حياتي

تحياتي:

مش قادرة اقولكم قد ايه اليومين اللي فاتوا كانوا من أسوء أيام حياتي ..........

نبدأ من يوم السبت 19/7/2008 وهو يوم تقديم الرغبات وطبعا انا ما كنتش لسه

جبت الدوسيه من المدرسة (كسل بقى ) وهو بيحتوي على الرقم السري المطلوب لتقديم

الرغبات على النت .... ولسوء حظي كنت ناسية ان مدرستي في بنها بتآخد إجازة في

يوم السبت ...طبعا رحت لفيت حوليها شوية واتصلت بأستاذ عندنا...... وعرفت في

الآخر ان الشريحة الأولى من المرحلة الاولى كده ضاعت ...وقلت قدر الله وما شاء فعل

..بكرة ان شاء الله اجيب الدوسيه واقدم عادي بقى...خصوصا بعد ما عرفت ان ما فيش

فرق بين الشريحة الاولى والثانية

أما يوم الأحد 20/7/2008.. دا كان يوم وحش جدا ...رحت المدرسة جبت استمارة

النجاح (معاها الرقم السري ) وجبت الدوسيه ...وحطيت الاستمارة جوة الدوسيه

.....وكنت فرحانه اوي ........وفجأة اتحولت الفرحة دي في لحظة إلى حزن كبير قوي

... لما روحت ..ببص على الورق ....مالقيتش ..استمارة النجاح والرقم السري

..........دا أنا مالحقتش أحطها في حتة علشان تضيع ...ونزلت دورت عليها في

الطريق اللي انا مشيته ....وطبعا مالقيتش حاجة ... حسيت ساعتها ان مستقبلي

بيضيع....... وكل أحلامي بتتبخر ........ وخلاص الامل ضاع........... المهم ...أنا

ويحيى أخويا رحنا القسم وعملنا مذكرة فقد للاستمارة والرقم علشان لو حد لقاها

ميقدرش يقدم بيها ........ وطبعا لازم اشكر يحيى جداااااااااااا لانه تعب معايا .... لغاية

ما لقى طريقه جابلي بيها الرقم السري ....وقدرت اقدم الرغبات الحمد لله

.............................وربنا ميجيبش أيام وحشة تاني

وظهرت....... بعد طوووووووول انتظار

تحياتي:

ايوة ظهرت نتيجة الثانوية اللي انا وجعت بيها دماغكم من زماااااااااااااااااااان
ما اقولكوش بقى في اللحظات الاخيرة كان قلبي بيدق جامد وصعقت اول ما ظهرت النتيجة ...يعني هي بس ماكنتش حلوة اوي...(هو التاريخ منه لله زي الكيمياء) ..جبت في ثالثة لوحدها 91.5....وفي السنتين 92.3 ..دا بالمستوى الرفيع
عموما الحمد لله اني عديت
ومن هنا ...(عبر مدونتي المتواضعة ) يسرني ويشرفني أن أرفع القبعة احتراما وإجلالا ..وان اهدي باقات من الورود ذات الرائحة الذكية ..إلى كل من علمني حرفا خلال المراحل التعليمية المختلفة (ثانوي ، اعدادي ، ابتدائي )
هؤلاء معلمين أفاضل :
أ/ عادل السيسي (لغة عربية )
أ/ محمد بيومي (لغة عربية )
أ/ بهية (لغة عربية )
أ/ رحاب الكفافي (لغة عربية)
أ/ نبيل منصور (لغة عربية )
أ/ نبيل الحسيني (لغة عربية )
أ/ حامد عبد الهادي (لغة انجليزية )
أ/ أحمد عبيدو (لغة انجليزية )
أ/ جلال سعيد (لغة انجليزية )
أ/ ربيع عرفة (لغة انجليزية )
أ/ ياسر محمود (لغة فرنسية )
أ/ طارق عبد المؤمن (كيمياء)
أ/ مصطفى أمين (كيمياء)
أ/ فكري ( أحياء)
أ/ أحمد عيسى (رياضيات)
أ/ أحمد مصطفى (رياضيات)
أ/ عماد صموئيل (رياضيات)
أ/ أنعام (تاريخ)
أ/ أحمد مرسي (تاريخ)
أ/ فؤاد (تاريخ)
أ/ رمضان (جغرافيا)
أ/ محمد عبد العزيز (علم نفس وفلسفة )
في كل مكان يوجد مدرسين أفاضل ...وقد يكونون أكثر من من ذكرتهم ...ولكن هؤلاء من عرفتهم...وأكن لهم كل الاحترام والتقدير

وصدقوني الحكاية مش المدرس شاطر ولا لأ ..الحكاية بترجع للطالب نفسه شاطر ولا لأ

ودمتم سالمين

هيييييييييييييييييييييييييييييييييييييييه خلصت وارتحت

الحمدلله الامتحانات خلصت ...بلا وجع دماغ ...بلا ثانوية عامية بلا قرف ....وخلاص بقى هابدأ من دلوقتي اغني بودعك لمرحلة المدارس دي ( دا لو ما غنتش قبلها دايما دمووووووووووووع دموووووووووع يوم النتيجة )...مش مشكلة بقى الامتحانات دي عدت ازاي بقى صعبة ولا سهلة المهم انها عدت وخلاص ولا تقولولي تاريخ هاسقط فيه ولا فلسفة ولا انجليزي حتى ..اللي حصل حصل واللي كان كان ....

المهم هأقضي الاجازة بطولها وبعرضها ..وأدي اهتمام اكتر لبلوجتي الغلبانة دي اللي محدش بيسال فيها وخلاص بقى هاتفرج على العاشرة مساء براحتي (قال يعني مكنتيش بتتفرجي عليها كلها لغاية الساعة 2 كل يوم )

ملحوظة : لو حد ناوي يرد ميقعدش بقى يجيب سيرة النتيجة والكلام الفاضي ده ..اللي عايز يرد بجد يقولي مبروووووووووووووووك اني طلعت من البيضة ( مرحلة المدارس )على رأي mr pro

تستحقيها بجدارة يا قمر

تحياتي

كنت قد قررت عدم كتابة أي بوست قبل الامتحانات ولكن لما المذيعة الرائعة منى الشاذلي تحصل على جائزة مصطفى وعلى أمين للصحافة فلازم أقولها مبرووووووووووووووووووووووووك من كل قلبي لأنها بجد تستحقها بجدارة.

فقد أعلن مجلس إدارة جمعية جائزة مصطفى وعلى أمين للصحافة عن فوز 8 صحفيين وإعلاميين بالجائزة لعام 2007 عن أعمالهم المتميزة.
وشملت :

• طبعا منى الشاذلي صاحبة البرنامج الجاد والأكثر من رائع (العاشرة مساء)
• محمد بركات رئيس تحرير الاخبار عن عمله المتميز فى تحرير وتطوير جريدة الاخبار
• مجدى الجلاد رئيس تحرير المصرى اليوم عن العمل الصحفى المتيمز فى الجريدة
• مصطفى النجار نائب رئيس تحرير الاهرام كأفضل كاتب متخصص فى السياحة وعن تميزه فى تحرير صفحات سياحة وسفر بالاهرام.
• محمد الشماع رئيس تحرير اخر ساعة عن جهوده فى تطوير اخر ساعة
• سهام ذهنى الكاتبة فى روزاليوسف عن انتاجها المتميز
• عمرو الليثى عن برنامج إختراق
• الفنانة كريمة مختار عن أدوارها الانسانية المتميزة وأخرها مسلسل "يتربى فى عزو"

وتعتبر جائزة مصطفى وعلى أمين أقدم جائزة صحفية فى مصر والشرق الاوسط وبدأت لاول مرة عام 85 وفاز بها حتى الان نخبة من الصحفيين فى مصر والدول العربية وسيقام احتفال توزيع الجائزة 7 مساء 13 أبريل المقبل بنقابة الصحفيين فى ذكرى وفاة مصطفى أمين .. حيث تم توجيه الدعوة لعدد من كبار المسئولين وكذلك نقيب الصحفيين ومجلس النقابة وأعضاء مجالس إدارته ورؤساء تحرير الصحف.
وفي الآخر مقدرش أقول غير ألف مبروووووووووووووووووووووووووووووووووك يا قمر

وأخييييييييييييييييرا ....انطلقت مدونتي

بسم الله الرحمن الرحيم

أعلن أنا marmarmarmora أنه في هذا اليوم وفي هذه الساعة أنطلقت مدونتي .. بعد أن عملت على تجهيزها ............مواطنة مع إيقاف التنفيذ....مش عارفة أنا سمتها كده ليه .......يمكن علشان في ناس كتييييييييييرة في مصرنا الحبيبة عايشين وفي نفس الوقت مش عايشين ....
ملحوظة :

تلبية لرغبة احدى الزائرات اللي هي أنا (مش عداد الزوار بيحسبني زائرة)!!!!

المهم يعني اني قررت ما اكتبش أي بوست تاني إلا لما امتحانات الثانوية (اللي هي امتحاناتي) تخلص

ادعولي الـ3 أشهر اللي جايين يمروا بسرعة ونبدأ امتحانات بقى ...علشان أنا زهقت

وادعولي أنجح وأحاول أجيب مجموع