تحياتي :
اقرا الحادثة .............اقرا الحادثة
علشان لما اقولكم متفكروش في دخول كلية التجارة تبقوا تصدقوني
اهي ولعت .. مبسوطين كدا
هو بصراحة انا مكنتش هناك ساعتها بس آثار الحريق باينة اوي
واللي حصل ان يوم السبت الموافق 29/11 حدث حريق بمكتبة كلية التجارة شعبة عربي
وبيقولوا بقى ان كان في مطافي وحاجات كدا
وطبعا سبب الحريق هو ماس كهربائي ....
معلش الخبر مش كامل اصلي محضرتش الحريق
وهي صورة واحدة بس اللي اخدتها ....و بصعوبة كمان ..علشان اللي كانوا قاعدين اصلا كانوا بيضحكوا عليا
وكأنهم عايزين يقولوا مين المجنونة اللي بتصور دي
ولما طلعت فوق علشان آخد صورة واضحة ..لقيت الأمن ..وطبعا مقدرتش اعمل حاجة
المهم بقى عايزة اقولكم عن نتيجة نتجت عن هذا الحادث الاليم
طبعا غير ان المكتبة العظيمة اللي عمري ما طلعتها ولعت
لا في نتيجة تانية ....وهي اغلاق باب مبنى محاضرات تجارة عربي
بعد دخول الطلاب لمحاضراتهم في المدرجات .... (يعني اللي جم متأخرين معرفوش يدخلوا حتى المبنى نفسه )
وللأسف لما المحاضرة خلصت ..قاموا بفتح الباب الخلفي للمدرج ..واللي هو تقريبا ميجيش متر في متر
وطبعا تزاحم الطلاب بشكل بصراحة وحش اوي وغير حضاري
يلا ..حصل خير ..والحمد لله الباب اتفتح ..وكله تمام
بس المبنى خد ديكور حلو اوي بصوا ..
طبعا في ناس .... هتقولي ..وانتي مالك بمبنى عربي ..مش انتي انجلش..خليكي في حالك
بأقولهم ..وايه الفرق بينهم ..مش اللي حصل ممكن يحصل عندنا برده ..وبعدين أنا ليا أصحاب كتير في عربي
ملحوظة : لوعرفت آخد صور تانية هيتم إضافتها للتدوينة
هناك ١٠ تعليقات:
معلش يا مرمر تعيشو وتاخدو غيرها..
وبعدين انتي بتقولي ماس كهربي وانا بقولك لا دا مش ماس كهربي دي محاولة انتحار ....ايوه محاولةانتحار ..الكليه حاولت تحرق نفسها عشان انا خرجت منها وعشان تصدقي انها محاولة انتحار اسالي نفسك كدا ليه ما حصلش الكلام دا قبل كدا ؟؟؟؟؟؟؟؟.
وبعدين في حاجه كمان (دي بجد باه)ازاي الاهمال يوصل بيهم لدرجة ان الحريق يوصل للمدرج اللي هو في الدور اللي اسفل المكتبه(دا اللي سمعته وقراته في الاهرام ان الحريق اصاب المدرج) وكمان يوصل الحريق للدرجه اللي تخلي المبني بالمنظر دا. (جميله يا بلدي )وكمان (عماااااااار يا مصر)..
ازيك يا مرمر
الله يكون فى عونكم
المبنى بقى شكله مش حلو خالص
بس اهم حاجة ياريت ميكنشى حد حصل له حاجة او تأذى من الحريق ده
وبجد شىء مؤسف جدا
لانه اكيد ادى لخسارة كبيرة
إيه ده ؟؟
ويوم مالكليه تولع ، المكتبه هي اللي تولع خساره والله
مكنتش المدرجات ولعت ..
يله خير أن شاء الله ، المره الجايه
وعقبال كليتنا لمتولع بس مش المكتبه لأني كدا كدا مش بدخلها اصلا
عاجبنى اسلوبك جدا ونظام المدونة وكل حاجة الصراحة الله ينور
خديجة
بقى الكلية هتنتحر علشان انتي خرجتي ..
دي اكيد عرفت انك ناوية تزوريها فمن
الخضة يعني ..
وعمار يا مصرنا الحبيبة
chemist
لا متقلقيش محدش تأذى..احنا عندنا طلبة
يأكلوا الزلط
ههههههههههههههههههههه
Reeman
شوفتي بقى ..
عقبال المدرجات والكلية كلها والطلبة
كمان ...
enjy
اشكرك لمرورك على مدونتي المتواضعة
..ويارب تكون نالت اعجابك
انا مكتش موجود حمداا لله سعتهه انا بروح الحد
hunter_korabika
وأنا كمان مكنتش موجودة برده
بس شوفتها اليوم اللي بعده
نورت المدونة
إرسال تعليق